ထောက်ပို့တပ်သား စည်းရုံးရေးမှူး ဒေါက်တာဖြိုးသီဟ

ကျွန်တော်ယုံကြည်တဲ့ တော်လှန်ရေးဆိုတာကတော့ စနစ်အပြောင်းအလဲကို ဦးတည်တာမို့ လူတဦးတယောက်၊ တစုတဖွဲ့ ကိုပျက်စီးစေလိုတဲ့ စေတနာနဲ့ လုပ်နေကြတာမဟုတ်ဘူး။ ပြည်သူပေါင်းများစွာရဲ့ ဘဝကို ဆင်းရဲတွင်းကနေတက်လာစေမဲ့ မျက်ရည်ပေါင်းများစွာ သုတ်ပေးဖို့ကြိုးစားနေတဲ့ဖြစ်စဉ်ကြီးမို့ အင်မတန်မွန်မြတ်တဲ့ကိစ္စပဲလို့ မှတ်ယူထားပါတယ်။

ဒေါက်တာဖြိုးသီဟသည် သူတတ်စွမ်းသည့် ကလောင်လက်နက်ဖြင့် လက်ရှိနွေဦးတော်လှန်ရေးတွင် အင်တိုက်အားတိုက် ပါဝင်နေသူတဦးဖြစ်ပါသည်။ ပြည်သူအများ သိသင့်သိထိုက်သည့် အကြောင်းအရာများ၊ စိတ်ပိုင်းဆိုင်ရာ၊ ကျန်းမာရေးနှင့် ပတ်သက်သည့် ဆောင်းပါးများ၊ ခက်ခဲသောကာလတွင် မည်သို့မည်ပုံရှင်သန်နေထိုင်သင့်သည်တို့ကို အစဉ်တစိုက် ရေးသားမျှဝေနေသူလည်း ဖြစ်သည်။ ဆိုရှယ်မီဒီယာတွင် လူသိများမှုကို အသုံးချပြီး ရန်ပုံငွေရှာဖွေရေး ကမ်ပိန်းများတွင်လည်း တတ်စွမ်းသမျှ ပါဝင်အားဖြည့်လျှက်ရှိပါသည်။